वीरगंज (पर्सा), १३ माघ । नेपाली कांग्रेस पर्सा निर्वाचन क्षेत्र नम्बर-४ को क्षेत्रीय कार्य समितिको बैठक मंगलबार जगरनाथपुर गाउँपालिका वडा नम्बर-५ झखरा मसिहानीमा सम्पन्न भएको छ । बैठकलाई सम्बोधन गर्दै प्रतिनिधिसभा सदस्य पदका उम्मेदवार रमेश रिजालले आगामी फागुन २१ गते हुने निर्वाचनमा नेपाली कांग्रेसको जित सुनिश्चित रहेको दाबी गरेका छन् ।
पूर्व मन्त्री तथा वर्तमान प्रतिनिधिसभा सदस्यसमेत रहेका रिजालले पार्टीका नेता-कार्यकर्तालाई उच्च मनोबलका साथ आ-आफ्नो टोल र बस्तीमा पुगेर निर्वाचन आचारसंहिता पालना गर्दै प्रचार–प्रसारमा सक्रिय हुन आग्रह गरे । कांग्रेसलाई कुनै शक्तिले पराजित गर्न नसक्ने बताउँदै उनले पार्टीले विगतमा गरेका काम र योगदानका विषयमा स्थानीय तहमा जनतालाई प्रष्ट रूपमा जानकारी गराउन आवश्यक रहेको उल्लेख गरे ।
उम्मेदवार रिजालले यसपटकको निर्वाचनलाई आफ्नो अन्तिम राजनीतिक लडाइँका रूपमा लिएको बताउँदै आगामी दिनमा युवा तथा नयाँ नेतृत्वलाई संसद् निर्वाचनका लागि तयार हुन समेत आह्वान गरे । क्षेत्रीय समितिका सभापति तथा जगरनाथपुर गाउँपालिकाका अध्यक्ष श्रीकान्त प्रसाद यादवको अध्यक्षतामा सम्पन्न उक्त बैठकमा मधेश प्रदेश सरकारका वन तथा वातावरण मन्त्री शंकर चौधरी, मधेश प्रदेश महामन्त्री बृहस्पति कृष्ण श्रेष्ठ, नेपाली कांग्रेस पर्साका प्रवक्ता रमेश पाण्डे, सह–सचिव नविन सिंह, नेता बशिष्ठ नारायण कुर्मी लगायतका वक्ताहरूले कांग्रेसलाई विजयी बनाउन सबै तहबाट सक्रिय रूपमा लाग्नुपर्नेमा जोड दिएका थिए ।
बैठकमा आगामी निर्वाचनको रणनीति, संगठन मजबुत बनाउने र स्थानीय तहमा पार्टीको जनाधार विस्तार गर्ने विषयमा समेत छलफल भएको क्षेत्रीय सचिव बलिष्टर अहमदले जानकारी दिए ।
प्रतिक्रिया दिनुहोस् !