वीरगंज (पर्सा), १२ माघ । पर्सा निर्वाचन क्षेत्र नम्बर २ बाट प्रतिनिधिसभा सदस्य पदका लागि राष्ट्रिय स्वतन्त्र पार्टी (रास्वपा) का उम्मेदवार सुशील कुमार कानुले वीरगंज महानगरपालिका-२४ बहुवरीमा स्थानीय युवाहरूसँग भेटघाट गरेका छन् । उक्त भेटघाट कार्यक्रममा विभिन्न क्षेत्र र पृष्ठभूमिबाट आएका युवाहरूले स्वतःस्फूर्त रूपमा रास्वपासँग आबद्ध हुँदै निर्वाचन अभियानमा सक्रिय भूमिका निर्वाह गर्ने प्रतिबद्धता जनाएका छन् । उनीहरूले आगामी निर्वाचनमा घण्टी छापको पक्षमा जनमत सिर्जना गर्ने जिम्मेवारी आफूहरूले लिने बताएका छन् ।
कार्यक्रमलाई सम्बोधन गर्दै उम्मेदवार कानुले युवाहरू नै देश रूपान्तरणका प्रमुख शक्ति भएको बताए । उनले पुरानो राजनीतिक प्रवृत्ति र निराशाबाट आजित युवाहरू आशा र भरोसाका साथ रास्वपामा जोडिँदै गएको उल्लेख गर्दै यसलाई सकारात्मक परिवर्तनको संकेतका रूपमा व्याख्या गरे । युवाहरूसँगै नयाँ राजनीतिक संस्कार स्थापित गर्ने प्रतिवद्धता व्यक्त गर्दै उनले जिल्लाभर युवाको समर्थन तीव्र रूपमा बढिरहेको दाबी गरे । कानुले देशमा आवश्यक परिवर्तन रास्वपाबाटै सम्भव हुने विश्वास पनि व्यक्त गरे ।
कार्यक्रममा सहभागी स्थानीय युवा विकास कुशवाहले आफूहरूले विगतमा धेरै नेताहरू देखेको तर अपेक्षित काम नदेखिएको बताए । अब युवाले नयाँ नेतृत्व खोजिरहेको र त्यसको विकल्प रास्वपामा भेटिएको उनको भनाइ थियो । सफा राजनीति र जबाफदेही नेतृत्वका पक्षमा वीरगंज-२४ का अधिकांश युवाहरू घण्टी छापमा मतदान गर्न तयार रहेको उनले स्पष्ट पारे ।
भेटघाट कार्यक्रमको अन्त्यमा उम्मेदवार कानुले उपस्थित सबै युवालाई पार्टीमा स्वागत गर्दै एकताबद्ध भएर परिवर्तनको यात्रामा अघि बढ्न आह्वान गरेका थिए ।
प्रतिक्रिया दिनुहोस् !