वीरगंज (पर्सा), ३० पुस । नेशनल मेडिकल कलेज प्रा.लि. तथा डि.ए.भी. आर.बी. केडिया स्कूल, वीरगञ्जबीच स्वास्थ्य सेवा सहकार्यसम्बन्धी औपचारिक सम्झौता सम्पन्न भएको छ । उक्त सम्झौता २०८२ साल पुस ३० गते नेशनल मेडिकल कलेज एण्ड टिचिङ हस्पिटलको केन्द्रीय कार्यालय, वीरगञ्ज–१५, पर्सामा आयोजित कार्यक्रमबीच सम्पन्न भएको हो ।
सम्झौताअनुसार डि.ए.भी. आर.बी. केडिया स्कूलका बोर्ड सदस्य, कर्मचारी, खेलाडी तथा उनीहरूका प्रत्यक्ष आश्रितहरूलाई नेशनल मेडिकल कलेजद्वारा विभिन्न किसिमका स्वास्थ्य सेवा सुविधा उपलब्ध गराइनेछ । सहकार्यअन्तर्गत आकस्मिक तथा आपतकालीन उपचार सेवा, क्यासलेस तेस्रो पक्ष बीमा सेवा, आवश्यकताअनुसार अन साइट क्लिनिक सञ्चालन, विभिन्न वेलनेस प्याकेज तथा अस्पतालमा उपलब्ध विविध सेवामा विशेष सहुलियत प्रदान गरिने व्यवस्था गरिएको छ ।
सम्झौतामा ओपीडी टिकट, जनरल बेड, आईसीयू, एनआईसीयू तथा पीआईसीयू सेवा, शल्यक्रिया, प्याथोलोजी परीक्षण, एक्स-रे तथा भिडियो एक्स-रे, ईसीजी, इको, टीएमटी, सिटी स्क्यान, एमआरआई तथा फार्मेसी सेवामा विशेष छुट र सुविधा उपलब्ध गराइने स्पष्ट गरिएको छ । उक्त सहकार्य सम्झौतामा नेशनल मेडिकल कलेज प्रा.लि.को तर्फबाट एकेडेमिक निर्देशक डा. रुबी श्रेष्ठ र डि.ए.भी. आर.बी. केडिया स्कूलको तर्फबाट प्रिन्सिपल राकेश कुमार मिश्रले हस्ताक्षर गर्नुभएको हो ।
सम्झौता प्रारम्भिक रूपमा एक वर्षका लागि लागू हुने र आपसी सहमतिमा नवीकरण गर्न सकिने व्यवस्था गरिएको छ । यस सहकार्यले दुवै संस्थाबीचको आपसी सम्बन्धलाई थप मजबुत बनाउनुका साथै विद्यालयसँग आबद्ध व्यक्ति तथा उनीहरूका परिवारलाई गुणस्तरीय स्वास्थ्य सेवामा सहज र सुलभ पहुँच सुनिश्चित हुने विश्वास लिइएको छ ।
प्रतिक्रिया दिनुहोस् !