वीरगंज (पर्सा), २० पुस । मकवानपुरको भीमफेदी गाउँपालिका–६ जुरिखेतमा आइतबार बिहान टाटासुमो दुर्घटना हुँदा ६ जनाको मृत्यु भएको छ । घटनामा चार जनाको घटनास्थलमै निधन भएको थियो भने दुई जनाको उपचारका क्रममा मृत्यु भएको स्थानीय श्रोतले जानकारी दिएको छ ।
काठमाडौंबाट हेटौंडातर्फ आउँदै गरेको ना. १ ज. १७७८ नम्बरको सुमो गाडी भीमफेदी गाउँपालिका–६ जुरिखेतस्थित भीमफेदी कुलेखानी काठमाडौं सडक खण्डमा दुर्घटनामा परेको हो । दुर्घटनामा तीन जना घाइते भएका छन् ।
घटनास्थलमा सवार ९ जनामध्ये ६ जनाको निधन भएको पुष्टि भएको छ । मृतक र घाइतेहरूको परिचय अहिलेसम्म सार्वजनिक गरिएको छैन । घाइतेहरूको उपचार हेटौंडा अस्पतालमा भइरहेको छ भने मृतकको शव पनि त्यहाँ ल्याइएको छ ।
जिल्ला प्रहरी कार्यालय मकवानपुरका अनुसार, सुमो सडकबाट करिब १०० मिटर तल खोल्सामा खस्दा दुर्घटना भएको थियो । इलाका प्रहरी कार्यालय भीमफेदीबाट खटिएको टोलीले घटनास्थलमा पुगेर घाइते र मृतकको उद्दार गरेको थियो ।
अस्पताल श्रोतका अनुसार, घाइते तीनमध्ये दुई जनाको अवस्था मध्यम रहेको छ । प्रहरीले मृतक सबैको परिचय खुल्न बाँकी रहेको जानकारी दिएको छ । दुर्घटनाले स्थानीय समुदायमा गहिरो दुःख र शोकको छाया छाएको छ । 
प्रतिक्रिया दिनुहोस् !