वीरगंज (पर्सा), १४ पुस । वीरगंजमा विगत केही वर्षयता विशेषगरी गर्मीयाममा दोहोरिँदै आएको खानेपानी अभावको दीर्घकालीन समाधानतर्फ महत्वपूर्ण कदम अघि बढाइएको छ । वीरगंजमा गर्मीको समयमा विगत तीन चार वर्षदेखि देखिएको खानेपानीको गम्भिर समस्यालाई ध्यानमा राख्दै संघीय सरकारले अघि सारेको महत्वाकांक्षी ‘वीरगंज खानेपानी वितरण प्रणाली’ परियोजना कार्यान्वयनको चरणमा प्रवेश गरेको हो ।
उक्त परियोजनाको निर्माणका लागि वीरगंज महानगरपालिकाले औपचारिक रूपमा ठेक्का आह्वान गरिसकेको छ । परियोजना सम्पन्न भएपछि वर्षौंदेखि खानेपानीको विकराल समस्या झेल्दै आएका वीरगंजवासीले २४ घण्टा सुरक्षित, शुद्ध र नियमित खानेपानी प्राप्त गर्ने अपेक्षा गरिएको छ ।
चार वर्षदेखि विशेष गरी गर्मी मौसममा गहिरिँदै गएको खानेपानी संकटलाई मध्यनजर गर्दै संघीय सरकारले यो दूरगामी परियोजना अगाडि सारेको थियो । दूरदृष्टि र दातृ निकायहरूसँगको प्रभावकारी समन्वयका कारण एसियाली विकास बैङ्क (एडिबी) को ठुलो लगानीमा यो परियोजना निर्माण हुन लागेको हो ।
परियोजना अन्तर्गत वीरगंज महानगरपालिकाका वडा नम्बर १ देखि १४, १६ र २४ सम्मका शहरी क्षेत्रलाई लक्षित गरी पाँच वटा आधुनिक ओभरहेड ट्यांकी निर्माण गरिनेछ । ती ट्यांकीहरू चिनीमिल क्षेत्र, पदम रोड, वडा नम्बर २४, जिल्ला प्रशासन कार्यालय पर्साको पछाडि तथा आदर्शनगरमा निर्माण हुने बताइएको छ । प्रत्येक ओभरहेड ट्यांकीको क्षमता ३ लाखदेखि ८ लाख लिटरसम्म रहनेछ ।
यसैगरी, शहरभरि करिब ३२२ किलोमिटर लम्बाइमा उच्च गुणस्तरको पाइपलाइन विस्तार गरिनेछ । सोही पाइपमार्फत महानगरका १६ वटा वडामा खानेपानी वितरण गरिने योजना रहेको छ । एसियाली विकास बैङ्क (एडिबी) को सहकार्यमा निर्माण हुन लागेको यस परियोजनामा आधुनिक प्रविधिको प्रयोग गरी पाइपलाइनमार्फत वितरण गरिने पानीको नियमित निगरानी गरिनेछ ।
साथै समय समयमा पाइपलाइनको मर्मतसम्भार गरिने भएकाले पाइप फुट्ने, पानी चुहिने (लिकेज) जस्ता पुराना समस्याहरू पूर्ण रूपमा अन्त्य हुने विश्वास गरिएको छ । यो महत्वाकांक्षी परियोजना निर्माण भई सञ्चालनमा आएपछि वीरगंजको वर्षौंदेखिको खानेपानी समस्या दीर्घकालीन रूपमा समाधान हुने विश्वास लिइएको छ । यस परियोजनाले लाखौँ वीरगंजवासीलाई शुद्ध र नियमित खानेपानी उपलब्ध गराउने मात्र नभई स्वास्थ्य, सरसफाइ र समग्र जीवनस्तरमा उल्लेखनीय सुधार ल्याउनेछ ।
वीरगंजको दिगो विकासतर्फ एक ऐतिहासिक परियोजनाका रूपमा हेरिएको यस खानेपानी वितरण प्रणालीले शहरको भविष्यलाई सुरक्षित, स्वस्थ र व्यवस्थित बनाउने अपेक्षा गरिएको छ । 
प्रतिक्रिया दिनुहोस् !