काठमाडौं, ११ पुस । मुख्य राजनीतिक दलहरू निर्वाचनबाट पन्छिन खोजिरहेको आशंका बढिरहेका बेला काठमाडौँ महानगरपालिकाका प्रमुख बालेन्द्र शाह (बालेन) ले एकाएक आफ्नो राजनीतिक सक्रियता तीव्र बनाएका छन् । पछिल्लो राजनीतिक अस्थिरता, निर्वाचनको अन्योल र पुराना दलहरूको जेनजीप्रति देखिएको प्रतिशोधपूर्ण अभिव्यक्तिका बीच बालेनको गतिविधि किङमेकरको भूमिकातर्फ उन्मुख देखिएको छ ।
बुधवारदेखि बिहिवार अबेरसम्म बालेनले एक दर्जनभन्दा बढी राजनीतिक, सामाजिक र बौद्धिक व्यक्तित्वहरूसँग भेटघाट गर्दै आफूलाई राजनीतिक ‘पावर सेन्टर’को रूपमा प्रस्तुत गरेका छन् । यी भेटघाटले बालेन केवल महानगर प्रमुखमा सीमित नरही राष्ट्रिय राजनीतिको निर्णायक भूमिकातर्फ अघि बढिरहेको सन्देश दिएको विश्लेषण भइरहेको छ ।
काठमाडौँ महानगरपालिकाका मेयर बालेन शाह सामान्यतया सार्वजनिक रूपमा कम बोल्ने नेता मानिन्छन् । मेयरमा निर्वाचित भएयता उनले स्वदेशी सञ्चारमाध्यमलाई औपचारिक अन्तरवार्ता समेत दिएका छैनन् । उनी आफ्ना विचार र निर्णयहरू प्रायः सामाजिक सञ्जाल, विशेषगरी फेसबुकमार्फत सार्वजनिक गर्छन् । उनका धेरै स्टाटस विवादमा पर्ने गरेका छन् भने समर्थकहरूले ती अभिव्यक्तिलाई पुराना दलप्रतिको साहसी प्रतिपक्षीय स्वरका रूपमा लिने गरेका छन् ।
काठमाडौँका मेयर भएपनि बालेन समकालीन नेपाली राजनीतिका सबैभन्दा प्रभावशाली प्रतिपक्षी आवाजमध्ये एक मानिन्छन् । सत्ता र शक्ति आफ्नै ढंगले प्रयोग गर्दै आएका पुराना दलहरूप्रति उनी प्रायः कटाक्ष गर्छन्, जुन जनताको ठूलो हिस्सालाई रुचिकर लाग्ने गरेको छ । करिब साढे तीन वर्षदेखि अनौपचारिक तर प्रभावशाली प्रतिपक्षको भूमिकामा रहेका बालेनले अब प्रत्यक्ष दलीय राजनीतिमा प्रवेश गर्ने संकेत देखाएका छन् ।
गत सोमवार अप्रत्याशित रूपमा उनले राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेटे । करिब छ घण्टा लामो उक्त भेटपछि राजनीतिक वृत्तमा हलचल मच्चियो । उक्त भेटको तरंग सेलाउन नपाउँदै बुधवार रातिदेखि बालेनले असामान्य ढंगले भेटघाट र संवादलाई तीव्र बनाए । बिहिवार बिहानैदेखि बालेन रास्वपा सहकार्य लगभग टुटेको संकेत दिने शैलीका समाचारहरू सार्वजनिक भए ।
रवि लामिछाने र रास्वपाको शैलीबाट असन्तुष्ट हुँदै बालेन आफैँ नयाँ दलको नेतृत्व गर्दै राजनीतिमा होमिन लागेको दाबीहरू समेत ‘ब्रेकिङ न्यूज’का रूपमा आए । तर ती चर्चाबीच केही समयमै बालेन र रवि लामिछानेबीच करिब दुई घण्टा लामो थप छलफल भएको श्रोतले जनाएको छ । बुधवारदेखि नै बालेन आफ्ना विश्वासपात्र कुमार व्यञ्जनकार (बेन) को ललितपुरस्थित घरलाई राजनीतिक संवादको केन्द्र बनाएर बसेका थिए ।
बुधवार रातिदेखि मध्यरातसम्मै बालेनले विभिन्न क्षेत्रका परिचित र प्रभावशाली व्यक्तिहरूसँग भेटघाट गरेका थिए । ललितपुरको ज्वागलस्थित कुमार बेनको निवासमा उनले कांग्रेस नेता चन्द्र भण्डारी, रेशम चौधरी, राप्रपा नेता ज्ञानेन्द्र शाही, सिके राउत, डा. भगवान कोइराला, रक्षा बम, निश्चन बस्नेत, सागर ढकाललगायतसँग संवाद गरेका थिए । यही म्याराथन शैलीको भेटघाटलाई उनले बिहिवार अबेरसम्म निरन्तरता दिएका थिए ।
किङमेकरको भूमिकामा बालेन
जेनजी आन्दोलनपछि कुनै औपचारिक संगठनबिनै जबरजस्त राजनीतिक प्रभाव कायम गरेका बालेन पछिल्लो समय केही चुपचाप देखिएका थिए । यसबीच बालेनको लोकप्रियता र प्रभाव कमजोर बन्दै गएको अनुमान पनि गरिन्थ्यो । तर बुधवारदेखि देखिएको तीव्र सक्रियताले उनलाई पुनः राजनीतिक केन्द्रमा ल्याइदिएको छ ।
रास्वपा सभापति रवि लामिछानेलाई भेटेपछि बालेनको गतिविधि यस तहमा बढेको देखिन्छ । यसअघि प्रधानमन्त्रीको प्रस्ताव अस्वीकार गरेका बालेनले पछिल्लो संवाद र भेटघाटमार्फत आफू सक्रिय राजनीतिमा प्रवेश गरिसकेको सन्देश दिएका छन् । उनीसँग भेटघाट गरेका अधिकांश जेनजी अगुवाहरूलाई उनले आफू राजनीतिमा आएको र सबै जेनजी शक्तिहरू एकजुट भएर सहकार्य गर्नुपर्ने अपिल गरेको श्रोतहरूले बताएका छन् ।
बालेनको लोकप्रियता यति व्यापक छ कि प्रतिनिधिसभा निर्वाचनमा उनी जुनसुकै क्षेत्रबाट उम्मेदवार बने पनि जित्ने हैसियतमा रहेको विश्लेषण गरिन्छ । तर उनले आफू मात्रै जितेर नहुने भन्दै १६४ वटै निर्वाचन क्षेत्रमा प्रतिस्पर्धा गर्न सक्ने योग्य र विश्वसनीय उम्मेदवार खोजिरहेको बताइएको छ । पछिल्ला भेटघाटहरूले उनी दीर्घकालीन राजनीतिक रणनीतिसहित अघि बढिरहेको पुष्टि गर्छन् ।
आगामी निर्वाचनका लागि पुस १३ र १४ गतेभित्र समानुपातिक उम्मेदवारको बन्दसूची निर्वाचन आयोगमा बुझाउनुपर्ने समयसीमा नजिकिँदै गर्दा बालेनले संवाद र भेटघाटलाई तीव्र बनाएका हुन् । रास्वपा र उज्यालो नेपाल पार्टीसँग शक्ति बाँडफाँटमा सहमति नभए ‘देश विकास पार्टी’मार्फत समानुपातिकतर्फ ११० निर्वाचन क्षेत्रका उम्मेदवारको सूची बुझाउने तयारीसमेत भइरहेको बुझिएको छ ।
अन्ततः, अप्रत्याशित रूपमा राजनीतिक संवाद र भेटघाटलाई तीव्र बनाउँदै बालेनले जेनजी आन्दोलनपछिको जनादेश र परिवर्तनको चाहनालाई आत्मसाथ गर्दै सक्रियता बढाएका छन् । यसले एकातिर पुराना दलहरूमा तरंग र दबाब सिर्जना गरेको छ भने अर्कोतर्फ नयाँ राजनीतिक कोर्सको खोजीमा रहेका नागरिकहरूमा भने छुट्टै उत्साह थपिदिएको छ ।
प्रतिक्रिया दिनुहोस् !