वीरगंज (पर्सा), ९ पुस । बाराको जितपुरसिमरा उपमहानगरपालिकामा अवस्थित जगदम्बा स्टील्स लिमिटेडमा कार्यरत मजदुरहरूले आर्थिक वर्ष २०८०/०८१ को सम्झौताअनुसार पाउनुपर्ने बोनस हालसम्म नपाएको भन्दै गम्भीर आक्रोश व्यक्त गरेका छन् । बोनस नपाउँदा श्रमिकहरूको दैनिकी मात्र नभई चाडपर्वसमेत प्रभावित भएको भन्दै उनीहरूले उद्योग व्यवस्थापनको गैरजिम्मेवार व्यवहारप्रति कडा आपत्ति जनाएका हुन् ।
नेपाल औद्योगिक मजदुर संघसँग आबद्ध जगदम्बा स्टील्स मजदुर युनियनले सिमरामा पत्रकार सम्मेलनको आयोजना गरी उद्योग व्यवस्थापनको लापरबाहीका कारण श्रमिकहरू गम्भीर समस्यामा परेको जनाएको छ । युनियनका अनुसार बारा जिल्लाको जितपुरसिमरा उपमहानगरपालिका–२ मा सञ्चालित उक्त उद्योगमा कार्यरत श्रमिकहरूले सम्झौताअनुसार पाउनुपर्ने बोनस समयमै नपाउँदा यस वर्ष दसैँ तिहारजस्ता महत्वपूर्ण चाडपर्वसमेत सहज रूपमा मनाउन नपरेको अवस्था सिर्जना भएको छ ।
युनियनले बोनस वितरणका लागि पटक पटक उद्योग व्यवस्थापनको ध्यानाकर्षण गराउँदा पनि कुनै सुनुवाइ नभएको आरोप लगाएको छ । युनियनका अनुसार उद्योग व्यवस्थापन करिब तीन महिनादेखि उद्योगमै अनुपस्थित रहँदै आएको छ, जसका कारण उद्योगमा श्रम ऐन तथा नियमावली विपरीत गतिविधि बढ्दै गएको र नियमित सञ्चालनमा समेत नकारात्मक असर परेको छ ।
पत्रकार सम्मेलनमा युनियनले ठेकेदारमार्फत काम गरिरहेका श्रमिकलाई न्यूनतम पारिश्रमिक नदिइएको, सामाजिक सुरक्षा कोषमा श्रमिकबाट कट्टा गरिएको रकम बराबर कम्पनीले थप गर्नुपर्ने २० प्रतिशत योगदानसमेत नगरेको गम्भीर आरोप लगाएको छ । यसले श्रमिकहरूको सामाजिक तथा आर्थिक सुरक्षामाथि गम्भीर प्रश्न उठाएको युनियनको भनाइ छ ।
यसैगरी उद्योगमा व्यवसायजन्य सुरक्षा व्यवस्थाको अभाव रहेको भन्दै श्रमिकहरू काम गर्ने क्रममा दुर्घटनामा परेर ज्यान गुमाउनुपर्ने अवस्था आएको दाबी पनि युनियनले गरेको छ । यस्ता समस्या समाधानका लागि उद्योग व्यवस्थापन तत्काल संवादमा आउनु आवश्यक रहेको भन्दै युनियनले जिम्मेवार भूमिका निर्वाह गर्न आग्रह गरेको छ ।
युनियनका अध्यक्ष दीपक कार्कीले मजदुरका जायज मागहरू तत्काल पूरा नगरे पुस १० गतेसम्म उद्योगको सम्पूर्ण कामकाज ठप्प पार्ने चेतावनी दिएका छन् । उनले माग पूरा नभए त्यसबाट उत्पन्न हुने कुनै पनि असहज परिस्थिति र क्षतिको सम्पूर्ण जिम्मेवारी उद्योग व्यवस्थापनले नै लिनुपर्ने स्पष्ट पारे ।
पत्रकार सम्मेलनमा उपस्थित जितपुरसिमरा उपमहानगर क्षेत्रका नेकपा एमाले, नेपाली काँग्रेस, नेपाली कम्युनिस्ट पार्टी र राष्ट्रिय स्वतन्त्र पार्टीका नगर स्तरीय नेताहरूले मजदुरका मागप्रति एकबद्धता जनाउँदै आ–आफ्नो पार्टीको तर्फबाट साथ, सहयोग र समर्थन रहने प्रतिबद्धता व्यक्त गरेका थिए । 
प्रतिक्रिया दिनुहोस् !