वीरगंज (पर्सा), ४ पुस । वीरगंज महानगरपालिका वडा नं. १८ स्थित भवानीपुरमा आजदेखि बर्थिङ सेन्टर औपचारिक रूपमा सञ्चालनमा आएको छ । सुरक्षित मातृत्व सेवा प्रवद्र्धन र स्थानीय महिलालाई सहज, गुणस्तरीय प्रसूती सेवा उपलब्ध गराउने उद्देश्यसहित स्थापना गरिएको यो केन्द्रको उद्घाटन महानगर प्रमुख राजेशमान सिंहले गरेका छन् ।
उद्घाटन समारोहमा बोल्दै प्रमुख सिंहले शहरका मात्र नभई ग्रामीण भेगका बासिन्दालाई सुगम र सुरक्षित प्रसूती सेवा उपलब्ध गराउने लक्ष्यका साथ यो बर्थिङ सेन्टर सञ्चालनमा ल्याइएको जानकारी दिए । स्वास्थ्य संस्थामै प्रसूती गराउन प्रोत्साहन गर्नु मातृ तथा शिशु मृत्युदर घटाउने सबैभन्दा प्रभावकारी उपाय भएको उनको भनाइ थियो ।
‘ग्रामीण क्षेत्रका गर्भवती महिलाले सामान्य प्रसूती सेवाका लागि पनि शहर धाउनुपर्ने बाध्यता हटाउन गाउँमै बर्थिङ सेन्टर सञ्चालनमा ल्याइएको हो,’ प्रमुख सिंहले बताए । उनले यस केन्द्रले स्थानीय महिलालाई समयमै र सुरक्षित सेवा प्राप्त गर्न ठूलो सहयोग पुग्ने विश्वास व्यक्त गरे । महानगरपालिकाका प्रमुख प्रशासकीय अधिकृत अरविन्द लाल कर्णले आवश्यक जनशक्ति र उपकरणको व्यवस्थापन पूरा गरी केन्द्र सञ्चालनमा ल्याइएको जानकारी दिए । उनले यस सेन्टरबाट स्थानीय बासिन्दाले प्रत्यक्ष लाभ पाउने उल्लेख गरे ।
वडा नं. १८ का वडा अध्यक्ष उमाशंकर तिवारीले बर्थिङ सेन्टर सञ्चालनमा आउँदा वडामै सामान्य प्रसूती सेवा उपलब्ध हुने भएकाले स्थानीय नागरिकलाई ठूलो सहजता प्राप्त हुने उल्लेख गरे । ‘यसअघि सुत्केरी व्यथा लागेपछि रातबिरात वीरगंज लैजानुपर्ने बाध्यता थियो,’ उनले भने । नवनिर्मित सेन्टरमा प्रि–डेलिभरी कक्ष, पोस्ट–डेलिभरी कक्ष, जाँच कक्ष, ड्रेसिङ रुम, प्रयोगशाला, स्टोर, प्रशासनिक कक्ष तथा छुट्टाछुट्टै शौचालय जस्ता सबै आवश्यक पूर्वाधारको व्यवस्था गरिएको छ ।
वीरगंज महानगरपालिकाले यसअघि पनि वडा नं. २१ लिपनीविर्ता र वडा नं. २८ बगहीमा बर्थिङ सेन्टर सञ्चालनमा ल्याइसकेको छ । वडा नं. २८ स्थित बगही स्वास्थ्य केन्द्रमा दुई जना विशेषज्ञ चिकित्सकसहित २४ सै घण्टा प्रसूती तथा बाह्य रोग (ओपीडी) सेवा सञ्चालन हुने गरी स्तरोन्नति गरिएको छ ।
वीरगंज बजार क्षेत्रमा नारायणी अस्पतालसहित विभिन्न निजी अस्पताल तथा क्लिनिकहरूले पनि विशेषज्ञ चिकित्सकमार्फत प्रसूती सेवा प्रदान गर्दै आएका छन् । महानगरपालिकाले शहर र ग्रामीण क्षेत्रको स्वास्थ्य सेवा सन्तुलित रूपमा विस्तार गर्दै स्थानीय महिलाको स्वास्थ्य सुनिश्चित गर्न निरन्तर प्रयासरत रहेको जनाएको छ । 
प्रतिक्रिया दिनुहोस् !