वीरगंज (पर्सा), ३ पुस । गत भदौ २३ र २४ भदौ भएको जेन–जी आन्दोलनका क्रममा केन्द्रीय कारागार जगन्नाथदेवल सुन्धाराबाट फरार भएका चारजना कैदीबन्दीलाई प्रहरीले विभिन्न स्थानबाट पक्राउ गरेको छ । फरारमध्ये दुई जनालाई बारा जिल्लाबाट र दुई जनालाई काठमाडौंको टोखा क्षेत्रबाट नियन्त्रणमा लिइएको प्रहरीले जनाएको छ ।
बाराबाट दुई कैदीबन्दी पक्राउ
प्रहरीका अनुसार बारा जिल्लाको करैयामाई गाउँपालिका–७ पिपरा निवासी २३ वर्षीय कृष्णा चौधरी र २९ वर्षीय विवेक चौधरीलाई बिहीबार बाराको पिपराबाट पक्राउ गरिएको हो । पक्राउपछि उनीहरूलाई वीरगंज कारागार पठाइएको प्रहरीले जानकारी दिएको छ ।
प्रहरीका अनुसार दुवैजना केन्द्रीय कारागार सुन्धारामा लागुऔषध मुद्दामा पुर्पक्षका लागि थुनामा रहेका कैदीबन्दी हुन् । २४ भदौको जेनजी आन्दोलनका क्रममा भएको अव्यवस्थाको फाइदा उठाउँदै उनीहरू कारागारबाट फरार भएका थिए ।
काठमाडौंको टोखाबाट थप दुई फरार कैदीबन्दी नियन्त्रणमा
यसैबीच, जेनजी आन्दोलनकै क्रममा सुन्धारा कारागारबाट फरार भएका थप दुईजना कैदीबन्दीलाई प्रहरीले काठमाडौंको टोखा क्षेत्रबाट पक्राउ गरेको छ । पक्राउ पर्नेमा काठमाडौं महानगरपालिका–टोखा नगरपालिका वडा नम्बर १ का ४६ वर्षीय श्यामलाल कँडेल र नुवाकोटको शिवपुरी गाउँपालिका–६ घर भई हाल काठमाडौंको बानियाटार बस्दै आएका ३० वर्षीय विनोद केसी उर्फ विनोद गौतम रहेका छन् ।
प्रहरीका अनुसार श्यामलाल कँडेल मानव बेचबिखन मुद्दामा ३२ वर्ष कैद सजाय सुनाइएका व्यक्ति हुन् । उनले हालसम्म ९ वर्ष कैद सजाय भुक्तान गरिसकेका थिए भने अझै २३ वर्ष कैद सजाय भुक्तान गर्न बाँकी छ ।
त्यस्तै, विनोद गौतम अपहरण तथा शरीर बन्धक, डाँका र संगठित अपराधसम्बन्धी मुद्दामा १३ वर्ष कैद सजाय सुनाइएका व्यक्ति हुन् । उनले ३ वर्ष कैद सजाय भुक्तान गरिसकेका छन् भने अझै १० वर्ष ६ महिना कैद सजाय भुक्तान गर्न बाँकी रहेको प्रहरीले जनाएको छ । लुकीछिपी बसिरहेको सूचनाका आधारमा दुवै जनालाई बिहीबार टोखाको टोखाचण्डेश्वरी क्षेत्रबाट नियन्त्रणमा लिइएको प्रहरीले जानकारी दिएको छ ।
खोजी तथा नियन्त्रण अभियान जारी
प्रहरीका अनुसार जेनजी आन्दोलनका क्रममा कारागारबाट फरार भएका कैदीबन्दीहरूको खोजी तथा नियन्त्रण अभियान निरन्तर जारी रहेको छ । फरार सबै कैदीबन्दीलाई कानुनी दायरामा ल्याउने उद्देश्यका साथ सुरक्षा निकायले निगरानी र अपरेसन तीव्र पारेको जनाएको छ । 
प्रतिक्रिया दिनुहोस् !