वीरगंज (पर्सा), ३ पुस । नेशनल मेडिकल कलेजको समन्वयमा वीरगंज महानगरपालिका वडा नम्बर २७ अन्तर्गत उदयपुर घुर्मीस्थित स्वास्थ्य चौकीमा निःशुल्क स्वास्थ्य शिविर सम्पन्न भएको छ । शिविरमा विशेष रूपमा महिला तथा बालबालिकालाई लक्षित गरी स्त्रीरोग र बालरोग सम्बन्धी निःशुल्क स्वास्थ्य परीक्षण तथा विशेषज्ञ परामर्श सेवा प्रदान गरिएको थियो ।
शिविर वडा नम्बर २७ का वडाध्यक्ष हृदय प्रसाद कुर्मीको समन्वय तथा सहयोगमा आयोजना गरिएको हो । बिहान १० बजेदेखि सुरु भएको शिविरमा स्थानीय समुदायका जम्मा १०७ जना महिला तथा बालबालिकाले स्वास्थ्य परीक्षण गराएका थिए ।
प्रारम्भिक परीक्षणदेखि विशेषज्ञ परामर्शसम्म
शिविरमा सहभागीहरूको सर्वप्रथम दर्ता प्रक्रिया पूरा गरिएपछि रक्तचाप, रगतमा चिनीको मात्रा, तौल, उचाइ, बीएमआई (बडी मास इन्डेक्स) तथा अक्सिजन स्याचुरेसन जस्ता प्रारम्भिक स्वास्थ्य परीक्षण गरिएको थियो । ती परीक्षणपछि सम्बन्धित विशेषज्ञ चिकित्सकबाट आवश्यक स्वास्थ्य परामर्श प्रदान गरिएको थियो ।
सेवाको सहज र प्रभावकारी व्यवस्थापनका लागि दर्ता, प्रारम्भिक परीक्षण तथा चिकित्सक परामर्शका लागि छुट्टाछुट्टै कक्षको व्यवस्था गरिएको थियो, जसले सेवाग्राहीलाई छिटो र व्यवस्थित रूपमा सेवा लिन सहयोग पुगेको आयोजकले जनाएको छ । 
जनप्रतिनिधि र चिकित्सकहरूको सक्रिय सहभागिता
शिविरमा वडा नम्बर २७ का वडाध्यक्ष हृदय प्रसाद कुर्मी, उदयपुर घुर्मी स्वास्थ्य चौकीका इन्चार्ज कृष्ण चन्द्र प्रसाद तथा नेशनल मेडिकल कलेजका मार्केटिङ म्यानेजर जितेश चन्द्र दासको उपस्थिति रहेको थियो ।
चिकित्सकीय सेवातर्फ बालरोग विशेषज्ञ डा. अशफाक अन्सारी र स्त्रीरोग विशेषज्ञ डा. रवि साहले प्रत्यक्ष रूपमा स्वास्थ्य परीक्षण तथा परामर्श प्रदान गरेका थिए ।
समुदायमै स्वास्थ्य सेवा पुर्याउनु प्रभावकारी
कार्यक्रमका क्रममा वक्ताहरूले समुदायको पहुँचमै पुगेर स्वास्थ्य सेवा उपलब्ध गराउनु प्रारम्भिक रोग पहिचान, समयमै उपचार तथा जनस्वास्थ्य सुदृढीकरणका लागि अत्यन्त महत्वपूर्ण रहेको धारणा राखेका थिए । स्थानीयवासीहरूले यस्तो उपयोगी तथा जनमुखी स्वास्थ्य शिविर आयोजना गरिएकोमा आयोजकप्रति आभार व्यक्त गरेका छन् ।
आयोजक पक्षका अनुसार निःशुल्क स्वास्थ्य शिविरले महिला तथा बालस्वास्थ्य प्रवद्र्धन, जनचेतना अभिवृद्धि तथा आधारभूत स्वास्थ्य सेवामा जनताको पहुँच विस्तार गर्न महत्वपूर्ण योगदान पुर्याएको छ । 
प्रतिक्रिया दिनुहोस् !