वीरगंज (पर्सा), २६ मंसिर । कर्तव्य ज्यान मुद्दामा १९ वर्षदेखि फरार रहेका एक अभियुक्त पक्राउ परेका छन् । प्रहरीले पर्साको बहुदरमाई नगरपालिका वडा नं. २ बस्ने ५४ वर्षीय विनोद प्रसाद कुर्मीलाई पक्राउ गरी सार्वजनिक गरेको हो ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) राजु कार्कीका अनुसार कुर्मीलाई वीरगंज महानगरपालिका वडा नं. २१ बाट गत बुधबार दिउँसो प्रहरीले कुर्मीलाई पक्राउ गरेको हो ।
प्रहरीका अनुसार २०६३ साल असोज ५ गते पर्साको तत्कालीन लिपनीवीर्ता–८ पटेलनगरका २३ वर्षीय सुरेश उर्फ रामप्रसाद पटेललाई सिर्सिया नदीको डिलमा लगेर कुटपिट गरी हत्या गरेको अभियोग कुर्मीमाथि छ । उक्त घटनापछि उनी निरन्तर फरार हुँदै आएका थिए ।
दीर्घ समयदेखि फरार रहेकाले विशेष सुराकीका आधारमा खोजी कार्यलाई तीव्र बनाएको प्रहरीले जनाएको छ । पक्राउपछि कुर्मीलाई कर्तव्यज्यान कसूरमा पर्सा जिल्ला अदालतबाट ७ दिनको म्याद थप अनुमतिपछि उनलाई हिरासतमा राखी थप अनुसन्धान भइरहेको डीएसपी कार्कीले जानकारी दिए ।
१९ वर्षपछि अभियुक्त पक्राउ परेसँगै पुरानो घटना अब कानुनी निष्कर्षमा पुग्ने अपेक्षा प्रहरीले गरेको छ । 
प्रतिक्रिया दिनुहोस् !