वीरगंज (पर्सा), १६ मंसिर । मधेस प्रदेशका आठ जिल्लामध्ये पर्सा जिल्लामा सबैभन्दा बढी एचआईभी/एड्स संक्रमित भेटिएका छन् । मधेस प्रदेश स्वास्थ्य निर्देशनालयका अनुसार, प्रदेशभर हालसम्म कूल ४ हजार ३ सय ३२ जना एचआईभी संक्रमितमध्ये पर्सामा मात्र १ हजार ८ सय ९६ जना फेला परेका छन्, जुन प्रदेशकै सर्वोच्च संख्या हो ।
३८ औँ विश्व एड्स दिवसको अवसरमा सोमबार जनकपुरमा आयोजित अन्तरक्रिया कार्यक्रममा स्वास्थ्य निर्देशनालयले प्रदेशभरका संक्रमितको अद्यावधिक तथ्यांक सार्वजनिक गरेको हो । कार्यक्रममा प्रस्तुत गरिएको विवरणअनुसार मधेसका जिल्लाहरूमा हालै मात्र ४ सय ७४ जना नयाँ एचआईभी संक्रमित पहिचान भएका छन् ।
स्वास्थ्य निर्देशनालयका एचआईभी सम्पर्क व्यक्ति राजवीर यादवका अनुसार, हालसम्म भेटिएका संक्रमितको जिल्लागत विवरण अनुसार पर्सा जिल्लामा १ हजार ८९६ जना, धनुषामा ८२२ जना, सर्लाहीमा ५२० जना, सिरहामा ४२६ जना, रौतहटमा ३९० जना, महोत्तरीमा ३६४ जना, बारामा २३८ जना तथा सप्तरीमा १८१ एचआईभी संक्रमितहरु भेटिएका हुन् ।
यीमध्ये ४७४ जना नयाँ संक्रमित रहेको बताइएको छ । नयाँ संक्रमितमध्ये १६ जना गर्भवती महिलाहरू रहेकी छिन् । त्यस्तै, नयाँ संक्रमितमध्ये उल्लेख्य संख्या वैदेशिक रोजगारबाट फर्किएका पुरुषको रहेको, साथै महिला, तेश्रोलिङ्गी तथा यौनकर्मीसमेत संक्रमितको सूचीमा परेको यादवले बताए ।
उपचार सेवा ११ एआरटी केन्द्रमार्फत
एचआईभी संक्रमित व्यक्तिहरूलाई नेपाल सरकारले दातृ निकायको सहयोगमा मधेस प्रदेशका ११ वटा एआरटी (Anti Retroviral Therapy) केन्द्रहरूमा स्वास्थ्यकर्मीको निगरानीमा औषधी वितरण गरिरहेको जानकारी दिइयो । संक्रमितहरूलाई दीर्घकालीन उपचार तथा परामर्श सेवा नियमित रूपमा प्रदान भइरहेको निर्देशनालयको भनाइ छ ।
बागमती सबैभन्दा बढी, कर्णाली सबैभन्दा कम
राष्ट्रिय स्तरमा हेर्दा सबैभन्दा धेरै एचआईभी संक्रमित बागमती प्रदेशमा ७ हजार १ सय ४ जना फेला परेको स्वास्थ्य निर्देशनालयले जनाएको छ । सबैभन्दा कम संक्रमित भने कर्णाली प्रदेशमा ७३१ जना रहेका छन् ।
स्वास्थ्य कार्यालय धनुषाका प्रमुख उमेश यादवको अध्यक्षतामा सम्पन्न कार्यक्रममा धनुषाका प्रमुख जिल्ला अधिकारी प्रेम प्रसाद लुइँटेल, जिल्ला समन्वय समिति धनुषाका प्रमुख राजनन्दन मण्डल, मधेस स्वास्थ्य विज्ञान प्रतिष्ठानका उपकुलपति प्रा. डा. अङ्कुर साहलगायत अधिकारी, स्वास्थ्यकर्मी र सरोकारवाला निकायका प्रतिनिधिहरूको सहभागिता रहेको थियो । 
प्रतिक्रिया दिनुहोस् !