वीरगंज (पर्सा), १६ मंसिर । मधेस प्रदेश सरकारले चालू आर्थिक वर्ष २०८२/८३ का लागि धानको न्यूनतम समर्थन मूल्य पुनः निर्धारण गर्दै संघीय सरकारले तोकेको मूल्यभन्दा उल्लेख्य रूपमा वृद्धि गरेको छ । मंगलबार बसेको मधेस प्रदेश सरकारको मन्त्रीपरिषद् बैठकले प्रदेशका किसानलाई प्रत्यक्ष राहत पुग्ने उद्देश्यले समर्थन मूल्य बढाएर लागू गर्ने निर्णय गरेको हो ।
सरकारले तोकेको नयाँ मूल्यअनुसार मोटो धानको न्यूनतम समर्थन मूल्य प्रति क्विन्टल ४ हजार रुपैयाँ निर्धारण गरिएको छ । त्यस्तै, मध्यम धानको समर्थन मूल्य प्रति क्विन्टल ४ हजार २ सय रुपैयाँ तोकिएको छ । चैते धानका लागि भने प्रति क्विन्टल ३ हजार रुपैयाँ समर्थन मूल्य कायम गरिएको मधेस सरकारले जनाएको छ ।
यसअघि संघीय सरकारले गत साउनमा चालू आर्थिक वर्षकै लागि मोटो धानको न्यूनतम समर्थन मूल्य प्रति क्विन्टल ३ हजार ४ सय ६३ रुपैयाँ र मध्यम धानको ३ हजार ६ सय २८ रुपैयाँ निर्धारण गरेको थियो । संघीय सरकारको दरका आधारमा हेर्दा मधेस सरकारले मोटो धानमा क्विन्टलका दरले ५३७ रुपैयाँ र मध्यम धानमा ५७२ रुपैयाँ मूल्यवृद्धि गरेको छ ।
प्रदेश सरकारका अनुसार किसानको उत्पादन लागत वृद्धि, बजारको अनिश्चितता र धान खेतीको दिगोपनालाई ध्यानमा राख्दै समर्थन मूल्य बढाउने निर्णय आवश्यक बनेको थियो । किसानमैत्री नीतिका रूपमा यस कदमले प्रदेशभर धान उत्पादक कृषकलाई राहत र प्रोत्साहन प्रदान गर्ने अपेक्षा प्रदेश सरकारले व्यक्त गरेको छ । 
प्रतिक्रिया दिनुहोस् !