वीरगंज (पर्सा), १६ मंसिर । पर्सा प्रहरीले विशेष सूचनाका आधारमा सञ्चालन गरेको अपरेशनबाट ठूलो मात्रामा गाँजा बरामद गर्दै एक कारसहित दुई जनालाई पक्राउ गरेको छ । सोमबार दिउँसो करिब ३ बजेतिर पटेर्वासुगौली गाउँपालिका–२, रंगपुर क्षेत्रमा लागुऔषध ओसारपसार भइरहेको गोप्य जानकारी पाएपछि खटिएको प्रहरी टोलीले सवारी साधन चेकजाँचका क्रममा गाँजासहितको कार नियन्त्रणमा लिएको हो ।
मनवाबाट रंगपुरतर्फ गइरहेको बिएबि–९३९८ नम्बरको मारुती सुजुकी कारलाई रोक्दै खानतलासी गर्दा प्लास्टिकले विशेष रूपमा लुकाइ–छिपाइ राखिएको ठूलो परिमाणको गाँजा फेला परेको जिल्ला प्रहरी कार्यालय पर्साले जनाएको छ । कारभित्र १० वटा पोका भेटिएका छन्, जसको तौल १०४ किलो ३२५ ग्राम रहेको बताइएको छ ।
प्रहरीले कारसँगै दुई जनालाई पनि पक्राउ गरेको छ । पक्राउ पर्नेहरूमा मकवानपुर भिमफेदी गाउँपालिका–८ का ३२ वर्षीय चालक भिम स्याङ्तान र मकवानपुरगढी गाउँपालिका–१ का ३८ वर्षीय कुमार स्याङ्तान रहेका छन् ।
उनीहरूलाई लागुऔषध सम्बन्धी कसूरमा नियन्त्रणमा राखेर थप अनुसन्धान भइरहेको जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक राजु कार्कीले जानकारी दिएका छन् । प्रहरीले बरामद गरिएको गाँजाको श्रोत, गन्तव्य र समूहमाथि अनुसन्धानलाई थप प्रभावकारी बनाएको जनाएको छ । 
प्रतिक्रिया दिनुहोस् !