वीरगंज (पर्सा), १६ मंसिर । अख्तियार दुरुपयोग अनुसन्धान आयोगले रौतहटको कटहरिया नगरपालिकामा नक्कली जनचेतनामूलक डकुमेन्ट्री निर्माण प्रकरणमा संलग्न ठहर गर्दै तत्कालीन निमित्त प्रमुख प्रशासकीय अधिकृत राम प्रकाश साहसहित ७ जनाविरुद्ध भ्रष्टाचार मुद्दा दायर गरेको छ । आर्थिक वर्ष २०७७/७८ मा जनचेतना अभिवृद्धिका उद्देश्य राखिएको डकुमेन्ट्री निर्माणको नाममा नक्कली काम देखाएर सरकारी रकम हिनामिना गरिएको प्रमाणित भएपछि आयोगले मंगलबार विशेष अदालत, काठमाडौँमा मुद्दा दर्ता गरेको हो ।
आयोगका अनुसार नगरपालिकाले कुनै वार्षिक कार्यक्रम र बजेट विनानै बदनियतपूर्ण ढङ्गले ‘सरिता फाउन्डेसन’लाई डकुमेन्ट्री निर्माणको जिम्मेवारी दिएको थियो । सम्झौता अनुसार डकुमेन्ट्रीमार्फत जनचेतना फैलाउनु पर्ने अवस्थामा भिडियोमा नगरप्रमुखको मात्र प्रशंसा गरिएको पाइएको छ । डकुमेन्ट्री न त प्रसारण नै गरिएको थियो, न त सम्बन्धित नियमानुसार प्रमाणीकरण गरिएको । उल्टो, नक्कली कागजात तयार गरी ९ लाख ९८ हजार ९ सय २१ रुपैयाँ भुक्तानी गरिएको अनुसन्धानबाट खुलेको आयोगले जनाएको छ ।
मुद्दा दायर गरिएका व्यक्तिहरूमा तत्कालीन निमित्त प्रमुख प्रशासकीय अधिकृत राम प्रकाश साह, लेखापाल विवेक कुमार सहनी, सहायक कर्मचारीहरू राम नरेश प्रसाद यादव र उमेश कुमार दास तत्मा, खरिदार कौशल किशोर चौधरी, छोटेलाल मिश्र तथा सरिता फाउन्डेसनकी निर्देशक सरिता कुमारी साह रहेका छन् ।
आयोगले उनीहरूलाई सरकारी धन हिनामिना गरेको प्रमाणित भएको भन्दै ९ लाख ९८ हजार ९ सय २१ रुपैयाँ बिगो तोकेको छ । सोही रकमबराबरको जरिवाना र कानुनअनुसार कैद सजायसमेतको मागदाबी गर्दै मुद्दा दायर गरिएको आयोगले जानकारी दिएको छ । अख्तियारको यो कदमले स्थानीय तहमा बढ्दो अनियमितता र गैरकानुनी खर्च प्रवाहमाथि कडाइका साथ कारबाही अघि बढाइएको सन्देश दिएको विश्लेषकहरूको भनाइ छ ।
प्रतिक्रिया दिनुहोस् !