वीरगंज (पर्सा), १३ मंसिर । नेकपा एमालेको ११ औं केन्द्रीय महाधिवेशनका लागि पर्सामा भइरहेको प्रतिनिधि छनोट प्रक्रियामा गम्भिर विवाद उत्पन्न भएपछि जिल्लास्थित पार्टी कार्यालयमा तालाबन्दी गरिएको छ । प्रतिनिधि चयनमा भएको भनिएको पक्षपात र धाँधलीविरुद्ध असन्तुष्ट समूहले शनिबार कार्यालयमै धर्ना बसेपछि निर्वाचन प्रक्रिया अनिश्चित बनेको हो ।
युवा क्लस्टरअन्तर्गत प्रदीप यादव र सन्तोष पासवानको उम्मेदवारी परेको थियो । तर प्रदीप यादवको उम्मेदवारी जबर्जस्ती खारेज गरिएको आरोप लगाउँदै यादव पक्षले तीव्र आपत्ति जनाउँदै तालाबन्दीसहित विरोध प्रदर्शन गरेको जनाएको छ । यसले निर्वाचन कार्य सम्पूर्ण रुपमा प्रभावित भएको असन्तुष्ट समूहको दाबी छ ।
असन्तुष्ट पक्षका नेताहरुले अन्य पार्टीबाट एमाले प्रवेश गर्ने नेताका लागि तोकिएको ७ वर्षे हदम्याद पर्सामा कार्यान्वयन नहुनु ठूलो अन्याय भएको बताएका छन् । दलित तर्फ क्षेत्र नं. १, वीरगंज महानगरपालिका वडा नं. ३२ का सोनालाल हजरा हालै मात्रै अर्को पार्टी छाडेर एमाले प्रवेश गरेका हुन् । उनलाई ७ वर्षे नियम नलाग्ने भन्दै उम्मेदवारी कायम राखिनुपर्ने माग एमाले वीरगंज महानगर लेखा समितिका अध्यक्ष अजय साहले राखेका छन् ।
महाधिवेशन प्रतिनिधि छनोटका लागि मंसिर १० गतेदेखि निर्वाचन तालिका सञ्चालनमा आएको थियो । सोही तालिका अनुसार शनिबार मतदान हुने तय भएपनि एक दिनअघि नै तालाबन्दी भएपछि निर्वाचन समितिले मतदान प्रक्रिया हाललाई स्थगित गरेको छ ।
आसन्न महाधिवेशनका लागि पर्साका सबै ४ क्षेत्रबाट कुल ३५ जना प्रतिनिधि चयन हुनुपर्नेछ । त्यसका लागि ९३ जनाले उम्मेदवारी दर्ता गराएका छन् । तर नेताहरु दुई छुट्टाछुट्टै समूहमा विभाजित भएपछि सहमतिमूलक छनोट कठिन बनेको र विवाद चुलिँदै गएको देखिन्छ । पार्टीको आन्तरिक विवाद बढ्दै गएपछि पर्साको प्रतिनिधि चयन प्रक्रिया कहिले पुनः सुरू हुने हो भन्ने अन्यौलता अझै कायम छ । 
प्रतिक्रिया दिनुहोस् !