कलैया (बारा), ८ मंसिर । भारतसँग जोडिएको सीमावर्ती क्षेत्र बाराको चिकनी स्थित आइतबार राति तस्करी रोक्न गएको प्रहरी टोली र तस्कर समूहबीच भिडन्त भएको छ । भन्सार छली गरी भारतबाट नेपाल भित्र्याउन लागिएको सामान नियन्त्रणमा लिन खोज्दा दुवैतर्फबाट गोली चलाएको जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक (डिएसपी) विजय राज पण्डितले जानकारी दिए ।
डिएसपी पण्डितका अनुसार भारततर्फबाट ट्याक्टरमा लोड गरिएको तस्करीको सामग्री नेपालतर्फ भित्र्याउँदै गरिएको सूचनाका आधारमा प्रहरी टोली खटिएको थियो । चिकनी गाउँस्थित पचरौत नगरपालिका–१ को सीमाक्षेत्रमा ट्याक्टरलाई रोक्दै नियन्त्रणमा लिन खोज्दा तस्कर समूहले प्रहरीमाथि नै आक्रमण गर्दै गोली चलाउन थालेको उनले बताए । तस्कर पक्षले दुई राउण्ड गोली प्रहार गरेपछि जीव रक्षा तथा परिस्थितिलाई नियन्त्रणमा लिन प्रहरी पक्षले प्रतिकार स्वरूप ६ राउण्ड गोली फायर गर्नुपरेको बताइएको छ ।
प्रहरीले घटना स्थल नजिकै रहेको इँटाभट्टा छेउबाट ट्याक्टरमा लोड गरिएको भन्सार छलीको सामग्री नियन्त्रणमा लिएको भएपनि तस्कर समूहले गोली प्रहार गर्दै प्रहरीलाई पछाडि धकेली ट्याक्टरसहित सामान भारततर्फको बिन्धवासिनी गाउँतर्फ लैजान सफल भएको प्रवक्ता पण्डितले बताए । घटनाका समयमा प्रहरीको संख्या कम भएकाले तस्करलाई तत्काल काबु गर्न कठिनाइ परेको प्रहरीले जनाएको छ ।
घटनास्थलबाट प्रहरीले चारवटा भारतीय नम्बर प्लेट भएका मोटरसाइकल, दुईवटा मोबाइल फोन र एक भारतीय आधार कार्ड बरामद गरेको छ । ती प्रमाणहरूले तस्कर समूह भारततर्फ भागेको पुष्टि गरेपनि उनीहरूबाट गोली हानाहानको क्रममा के कति क्षति भयो भन्ने यकिन हुन नसकेको प्रहरीले जनाएको छ ।
ट्याक्टरमा लोड गरिएको सामग्री भने पहिचान हुन बाँकी रहेको बताइएको छ । प्रहरीमाथि गोली प्रहार गर्ने तस्कर समूहको पहिचान तथा पक्राउका लागि विस्तृत अनुसन्धान सुरु गरिएको प्रवक्ता पण्डितले बताए ।
प्रतिक्रिया दिनुहोस् !