• मुस्कान श्रेष्ठ
वीरगंज (पर्सा), २९ असोज । दशरथ रंगशालापछि मुलुकको दोश्रो ठूलो रंगशाला हो, वीरगंजस्थित नारायणी रंगशाला । भौतिक पूर्वाधारले सम्पन्न यो रंगशाला संरक्षणको अभावमा जीर्ण र जर्जर बन्दै गएको छ भने अतिक्रमणको चपेटामा समेत परेको छ । २०४२ सालमा तत्कालीन अञ्चलाधीश लक्ष्यबहादुर गुरुङ्गको पहलमा २० विघा जग्गामा निर्माण गरिएको नाराायणी रंगशाला अहिले १८ विघामा खुम्चिन पुगेको छ ।
कुनैबेला राष्ट्रिय स्तरको खेल प्रतियोगिता भएको यस रंगशालामा करिब ढेड दशकदेखि कुनै ठूला खेलहरु हुन सकेको छैन । राज्यले आफ्नै सम्पतिको संरक्षण गर्न नसक्दा रंगशालाको अवस्था दिन प्रतिदिन दयनीय बन्दै गएको छ । खेलाडीहरु प्रशिक्षण गर्ने उक्त रंगशाला अहिले गौँ चरण र सवारीसाधान सिक्ने थलो बनेको छ । यती ठूलो संरचनाको सदुपयोग गर्न नपाउँदा वीरगंजबासी निराश छन् । पछिल्लो समय नेपाली राष्ट्रिय खेलाडीहरुले खेलको माध्यमबाट देशलाई विश्वमाझ चिनाउन सफल भएका छन् ।
अझ विश्वमा चर्चा बटुलेका राष्ट्रिय क्रिकेट खेलाडी आरिफ शेख र आशिफ शेख वीरगंजकै हुन् । यती धेरै खेल क्षेत्रमा सम्भावना बोकेको वीरगंजलाई राज्यले उपेक्षा गर्दै आएको छ । सरकारले मूलपानी क्रिकेट मैदान, मोरङको बैजनाथपुरमा निर्माणाधीन गिरिजाप्रसाद कोइराला क्रिकेट रंगशाला र चितवनको भरतपुरमा धुर्मुस सुन्तली फाउन्डेसनले सुरु गरेर अलपत्र रहेको गौतमबुद्ध अन्तर्राष्ट्रिय क्रिकेट रंगशालालाई राष्ट्रिय गौरवका आयोजनामा समावेश गर्ने निणर्य गर्यो तर संरक्षणको गुहार गर्दै आएको नारायणी रंगशालालाई राज्यले नदेख्नु वीरगंजलाई उपेक्षामै पारिएको प्रमाण पनि हो ।
आर्थिक वर्ष २०७७/०७८ मा सरकारले रंगशाला पुननिर्माणका लागि ५ करोड र नयाँ कभर्डहल निर्माणका लागि २ करोड रुपैयाँ विनियोजन गरेको थियो । रंगशालाको ब्लक ‘सी’को पुरानो प्यारापिट भत्काएर नयाँ निर्माण सम्पन्न भएको छ भने गत आर्थिक वर्षमा सोही प्यारापिटको रेलिङ, प्लाप्टरका कार्य पनि सम्पन्न भइसकेको छ । कभर्डहलका लागि सरकारले दुई पटक गरी हालसम्म २ करोड १३ लाख रुपैयाँ पठाएको छ । तर, चालू आर्थिक वर्षमा रंगशालाको पूर्न निर्माणका लागि बजेट विनियोजन नगर्दा अहिले पूर्न निर्माण कार्य ठप्प छ ।
डीपीआर अनुसार रंगशालाको पुनर्निर्माणमा २ अर्ब ६४ करोड रुपैयाँ खर्च हुने भनिएपनि हालसम्म सरकारले ७ करोड मात्रै पठाएको छ । राज्यले नारायणी रंगशालाको बजेट नपठाउनुको कारण विदेशी अनुदानको बाटो कुरि रहेको राष्ट्रिय खेलकुद परिषदका मधेश प्रदेशका बोर्ड सदस्य मानदेव हजरा बताउँछन् । केहीसमय अघि मात्रै नारायणी रंगशालका निरीक्षणमा आएका खेलकुद मन्त्री तेजुलाल चौधरीले पनि वीरगंजको नारायणी रंगशाला पुनः निर्माणका लागि कतार सरकारसँग छलफल भइरहेको र सम्झौता कार्य आन्तिम चरणमा पुगेको बताएका थिए ।
आगामी वर्ष मधेशमा ११औँ राष्ट्रिय खेलकुद प्रतियोगिता गराउने योजना रहेको भएपनि रंगशालाको वर्तमान अवस्था र राज्यको वेवास्ताका कारण सो को सम्भावना न्यून रहेको छ । 
प्रतिक्रिया दिनुहोस् !