• हरिशंकर शर्मा
वीरगंज (पर्सा), ३ चैत । वीरगंजको आदर्शनगर रंगशालामा शुक्रबारदेखि ‘मारवाडी प्रिमियर लिग’ क्रिकेट टुर्नामेन्ट शुरु भएको छ । मारवाडी युवा मञ्च वीरगंजले आयोजना गरेको क्रिकेट टुर्नामेन्टलाई उद्घाटन गर्दै वीरगंज महानगरपालिकाका नगर प्रमुख राजेशमान सिंहले खेलकुद क्षेत्रको विकासको लागि महानगर सधैं तयार रहेको बताए । मारवाडी युवा मञ्च वीरगंजको प्रयासले क्रिकेटको क्षेत्रमा कोशेढुँगा सावित हुने विश्वास लिएको बताए ।
उनले संघीय सरकारको मातहतमा रहेको नारायणी रंगशाला भित्र रहेको क्रिकेट मैदानलाई यो आर्थिक वर्षमा स्तरोन्नति गरिने बताए । क्रिकेट मैदान स्तरोन्नतिको लागि महानगरपालिकाले पर्सा क्रिकेट एशोसिएसनसँगको सहकार्यमा हातेमालो गर्दै अगाडि बढेको उनले बताए । खेलकुद क्षेत्रको विकासको लागि महानगर सदैव तत्पर रहेको भन्दै महानगर प्रमुख सिंहले यही असारसम्म आदर्शनगर रंगशालाको पनि स्तरोन्नति गरिने बताए ।
उनले खेलकुदको लागि यहाँ निर्माण गरिएको मैदानहरुलाई विभिन्न धार्मिक एवं साँस्कृत्तिक कार्यमा प्रयोग गरिँदै आएकोमा अबदेखि खेलकुद मैदान खेलकुदकै लागि मात्रै प्रयोग गरिने बताए । त्यसको साथसाथै वीरगंजमा खेलकुदप्रति युवाहरुलाई प्रोत्साहन गर्नको लागि महानगरपालिकाले खेलकुद एकडेमीको पनि स्थापना गर्न लागेको उनको भनाई थियो ।
कार्यक्रममा बोल्दै सिंहले वैभव वीरगंजको परिकल्पनालाई साकार पार्न वीरगंजबासीको साथ र सहकार्य आवश्यक रहेको बताए । उनले सबै कुरा मेयरसँग मात्रै सम्भव नरहेकोले समय समयमा वीरगंजबासीले विकासको लागि सल्लाह दिन आग्रह समेत गरे । मारवाडी युवा मञ्च वीरगंजका अध्यक्ष गोविन्द साहको सभापतित्वमा आयोजित उद्घाटन कार्यक्रममा उद्योगपति बाबुलाल चाचान, अशोक वैद्य, गणेश लाठ, बिजय सरावगी, अशोक टेमानी, अनिल अग्रवाल, ओमप्रकाश शर्मा लगायतको उपस्थिति रहेको थियो ।
८ दिनसम्म चल्ने उक्त क्रिकेट प्रतियोगितामा १ सय १२ जना खेलाडीको ८ वटा टिमले डे-नाइट गरि १५ प्रतियोगितामा भिड्नेछन् । 
प्रतिक्रिया दिनुहोस् !