वीरगंज (पर्सा), १४ असार । वीरगंज महानगरपालिकाको सरसफाइ व्यवस्थापनको जिम्मा लिएको ठेकेदार कम्पनी र आन्दोलनरत सरसफाइ कर्मचारीबीच भएको वार्तापछि विवाद समाधान भएको छ । कर्मचारीका जायज माग सम्बोधन गर्ने ठेकेदार पक्षको प्रतिबद्धतासँगै आन्दोलन फिर्ता लिइएको छ भने कर्मचारीहरू आइतबार साँझदेखि पुनः नियमित सरसफाइ कार्यमा फर्किएका छन् ।
तलब वृद्धि तथा श्रमसम्बन्धी विभिन्न माग राख्दै आन्दोलनमा उत्रिएका सरसफाई कर्मचारीहरूले आइतबार बिहान वीरगंजको घण्टाघर चोक, महानगरपालिकाको मूल गेटलगायत विभिन्न स्थानमा सडकमै फोहोर थुपारेर विरोध प्रदर्शन गरेका थिए । महानगरपालिकाको कार्यालय अगाडि गरिएको प्रदर्शनका क्रममा प्रहरीले लाठीचार्ज गरी प्रदर्शनकारीलाई तितरबितर पारेको थियो ।
घटनापछि वीरगंज महानगरपालिकाका कार्यवाहक नगरप्रमुख इम्तियाज आलमले सरसफाई सेवा अवरुद्ध हुँदा नगरवासीलाई पर्न गएको असुविधाप्रति गम्भीर चासो व्यक्त गर्दै ठेकेदार कम्पनीलाई तत्काल आन्दोलनरत कर्मचारीसँग वार्ता गरी समस्या समाधान गर्न निर्देशन दिएका थिए । कार्यवाहक नगरप्रमुख आलमको पहलमा आइतबार अपराह्न ठेकेदार कम्पनीका प्रतिनिधि शिव गुप्ता र आन्दोलनरत सरसफाई कर्मचारीबीच भएको छलफल सकारात्मक बनेपछि दुवै पक्ष सहमतिमा पुगेका हुन् । छलफलमा कर्मचारीका जायज माग क्रमिक रूपमा सम्बोधन गर्ने प्रतिबद्धता जनाइएपछि आन्दोलन फिर्ता भएको र कर्मचारीहरू सोही साँझदेखि सरसफाइ कार्यमा फर्किएको आलमले जानकारी दिए ।
उनका अनुसार महानगरपालिकाले नगरको नियमित सरसफाई सेवा प्रभावित हुन नदिन समन्वयात्मक भूमिका निर्वाह गरेको हो । संवाद र सहमतिमार्फत समस्या समाधान गर्नु नै महानगरको प्राथमिकता रहेको उल्लेख गर्दै उनले आगामी दिनमा पनि सरसफाइ सेवामा कुनै अवरोध आउन नदिने प्रतिबद्धता व्यक्त गरे । आन्दोलनरत सरसफाइ कर्मचारीहरूले दैनिक ज्याला कम्तीमा एक हजार रुपैयाँ कायम गर्नुपर्ने तथा मासिक ३० हजार रुपैयाँ पारिश्रमिक सुनिश्चित गरिनुपर्ने मुख्य माग अघि सारेका थिए । बढ्दो महँगीका कारण हालको पारिश्रमिकले परिवार धान्न कठिन भएको उनीहरूको गुनासो छ ।
त्यस्तै, प्रत्येक महिनाको १० गतेभित्र नियमित रूपमा तलब भुक्तानी, श्रम ऐनअनुसार हप्तामा एक दिन साप्ताहिक बिदा, तथा छठ र होलीजस्ता प्रमुख पर्वमा विशेष बिदाको व्यवस्था गर्नुपर्ने उनीहरूको माग छ । सरसफाइकर्मीहरूले मानवीय संवेदनासँग जोडिएका सुविधा पनि माग गरेका छन् । परिवारमा मृत्यु वा विवाहजस्ता विशेष अवस्थामा १० हजार रुपैयाँ अग्रिम रकम (एडभान्स) उपलब्ध गराउने व्यवस्था गर्नुपर्ने, सबै कर्मचारीलाई आधिकारिक पोसाक (ड्रेस) र परिचयपत्र प्रदान गर्नुपर्ने उनीहरूको माग रहेको छ ।
यसैगरी, कर्मचारीलाई धम्क्याएर रकम असुल्ने तथा जागिरबाट हटाइदिने चेतावनी दिने भ्रष्ट नाइकेहरूलाई पहिचान गरी कडा कानुनी कारबाही गर्न पनि उनीहरूले महानगर नेतृत्वसँग माग गरेका छन् । महानगरपालिकाले सरसफाई कर्मचारी, ठेकेदार कम्पनी र सम्बन्धित पक्षबीच निरन्तर समन्वय गर्दै समस्या समाधानको प्रक्रिया अघि बढाइएको जनाएको छ । सहमतिसँगै वीरगञ्जको नियमित सरसफाइ सेवा पुनः सञ्चालनमा आएको छ । 
प्रतिक्रिया दिनुहोस् !