वीरगंज (पर्सा), २१ वैशाख । वीरगंजस्थित नारायणी रंगशाला तर्फ जाने सडकखण्डमा सोमबार बिहान बृहत् सरसफाइ कार्यक्रम सम्पन्न गरिएको छ ।
वीरगंज महानगरपालिका–१३ अन्तर्गत पर्ने उक्त सडकमा महानगरपालिकाको अगुवाइमा सरसफाइ अभियान सञ्चालन गरिएको हो । सरसफाइ कार्यक्रममा महानगरका प्रमुख राजेशमान सिंहसहित विभिन्न संघसंस्थाका प्रतिनिधि, सुरक्षाकर्मी, विद्यार्थी तथा शिक्षकहरूको सक्रिय सहभागिता रहेको थियो ।
कार्यक्रममा गौतम माध्यमिक विद्यालयका विद्यार्थी तथा शिक्षक, ग्रीनसिटी सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतान, पर्साका प्रहरी नायब उपरीक्षक राजु कार्की, सशस्त्र प्रहरी नायब उपरीक्षक मोहन निरौला, ट्राफिक प्रहरी निरीक्षक युवराज कटुवाल तथा नगर प्रहरी प्रमुख हरि भुसाललगायतको उपस्थिति रहेको जनाइएको छ ।
स्थानीय तह र सरोकारवालाबीचको सहकार्यमा सञ्चालन गरिएको उक्त सरसफाइ अभियानले क्षेत्रलाई स्वच्छ, सफा र व्यवस्थित बनाउने उद्देश्य राखिएको महानगरपालिकाले जनाएको छ ।
प्रतिक्रिया दिनुहोस् !