वीरगंज (पर्सा), १६ चैत । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीको पक्राउको विरोधमा सोमबार साँझ वीरगंजमा मशाल जुलुस प्रदर्शन गरिएको छ । ओलीको रिहाइको माग गर्दै एमालेका नेता तथा कार्यकर्ताहरू सडकमा उत्रिएका हुन् । एमाले मधेश प्रदेशका उपाध्यक्ष बिचारी यादवको नेतृत्वमा आयोजित प्रदर्शनमा सहभागीहरूले सरकारविरुद्ध चर्को नाराबाजी गर्दै पक्राउप्रति तीव्र असन्तुष्टि व्यक्त गरेका थिए ।
उनीहरूले ओलीमाथिको कारबाही राजनीतिक पूर्वाग्रहबाट प्रेरित भएको आरोप लगाउँदै अविलम्ब रिहाइको माग गरेका छन् । मशाल जुलुस वीरगञ्जका विभिन्न स्थान परिक्रमा गर्दै अघि बढेको थियो । प्रदर्शनका क्रममा प्रहरीले केही स्थानमा हस्तक्षेपसमेत गरेको जनाइएको छ । उक्त कार्यक्रममा एमालेका नेता तेज प्रकाश निसाद, युवा नेता आसिफ अली, अंगद गुप्ता, बिकी सिंह लगायतको उपस्थिति रहेको थियो ।
सहभागीहरूले लोकतान्त्रिक मूल्य–मान्यता जोगाउन सबै राजनीतिक दल तथा सरोकारवाला निकाय जिम्मेवार बन्नुपर्नेमा जोड दिएका थिए । एमालेले आफ्ना शीर्ष नेतामाथि गरिएको कारबाहीको विरोधमा देशव्यापी रूपमा आन्दोलनलाई निरन्तरता दिने चेतावनीसमेत दिएको छ ।
प्रतिक्रिया दिनुहोस् !