वीरगंज (पर्सा), ९ चैत । नेकपा एमालेका नेता तथा पर्सा क्षेत्र नम्बर–३ का प्रतिनिधिसभा सदस्यका उम्मेदवार रुपेश पाण्डे सहितका नेताहरूले पार्टीको निर्वाचन परिणामबारे महासचिव शंकर पोखरेलसँग समिक्षात्मक छलफल गरेका छन् ।
सोमबार ललितपुरको च्यासलस्थित नेकपा एमालेको केन्द्रिय कार्यालयमा आयोजित उक्त बैठकमा फागुन २१ गते सम्पन्न प्रतिनिधिसभा निर्वाचनमा पर्सा क्षेत्र नम्बर–३ सहित विभिन्न क्षेत्रमा पार्टीले व्यहोरेको हारका कारणबारे गम्भीर समीक्षा गरिएको थियो ।
छलफलका क्रममा नेताहरूले पराजयका कारण आन्तरिक कमजोरी मात्र नभई बाह्य राजनीतिक परिस्थितिहरू पनि जिम्मेवार रहेको निष्कर्ष निकालेका छन् । साथै, संगठनलाई थप मजबुत बनाउने, जनतासँगको सम्बन्ध सुधार्ने तथा आगामी निर्वाचन रणनीतिमा आवश्यक परिमार्जन गर्नुपर्नेमा जोड दिइएको थियो ।
बैठकमा एमालेका केन्द्रीय सदस्य प्रभु हजरा, निर्मला देवकोटा तथा बाँके क्षेत्र नम्बर–२ बाट निर्वाचित प्रतिनिधिसभा सदस्य एवं पूर्व मन्त्री मोहम्मद इस्तियाक राईको समेत उपस्थिति रहेको थियो । छलफलपछि पार्टीलाई आगामी दिनमा अझ सशक्त बनाउँदै जनविश्वास पुनः स्थापित गर्ने लक्ष्यका साथ ठोस कार्ययोजना तयार गरी अघि बढ्ने सहमति भएको जनाइएको छ ।
प्रतिक्रिया दिनुहोस् !