वीरगंज (पर्सा), ५ चैत । नेपाल राष्ट्र बैंक वीरगंज शाखाको आयोजनामा ‘ग्लोबल मनी वीक २०२६’ को अवसर पारेर बिहीबार जनचेतनामूलक प्रभातफेरी कार्यक्रम उत्साहपूर्वक सम्पन्न भएको छ । ‘स्मार्ट मनि टक, ओपेन अप, स्टार्ट टु टक, ग्रो वीथ फाइनान्सियल नौलेज’ भन्ने नारासहित आयोजना गरिएको कार्यक्रमले वित्तीय साक्षरता अभिवृद्धि गर्ने लक्ष्य लिएको थियो ।
कार्यक्रमअन्तर्गत निकालिएको प्रभातफेरी वीरगंज स्थित राष्ट्र बैंक शाखाबाट सुरु भई मकालु चौक हुँदै शहरका विभिन्न मुख्य सडकहरूको परिक्रमा गर्दै घण्टाघर मा पुगेर सम्पन्न भएको थियो । उक्त कार्यक्रममा विभिन्न वाणिज्य बैंक, विकास बैंक तथा फाइनान्स कम्पनीका कर्मचारीहरूको उल्लेखनीय सहभागिता रहेको थियो । सहभागीहरूले हातमा ब्यानर र प्लेकार्ड बोकेर वित्तीय ज्ञानको महत्वबारे सर्वसाधारणलाई सचेत गराएका थिए ।
कार्यक्रमका क्रममा बचत गर्ने बानीको विकास, सुरक्षित लगानीको अभ्यास, डिजिटल बैंकिङको प्रयोग र जिम्मेवार वित्तीय व्यवहार अपनाउन सर्वसाधारणलाई प्रेरित गरिएको राहुल ओझाले जानकारी दिए । सुशील पौडेलको नेतृत्वमा सम्पन्न उक्त कार्यक्रमले समुदायमा वित्तीय चेतना फैलाउन महत्वपूर्ण योगदान पुर्याउने विश्वास गरिएको छ । साथै, यस्ता सचेतनामूलक अभियानहरूले दीगो आर्थिक विकासमा समेत सकारात्मक प्रभाव पार्ने अपेक्षा गरिएको छ ।
प्रतिक्रिया दिनुहोस् !