• हरिशंकर शर्मा
वीरगंज (पर्सा), ८ जेठ । तराईमा गर्मी बढेसँगै जनजीवन कष्टकर बन्दै गएको छ । तातो हावा तथा बढ्दो गर्मीका कारण पर्सा – बारा सहित तराईको जनजिवन प्रभावित बनेको हो । एका विहानैदेखि सूर्योदय हुनासाथ चर्को घामका कारण जिउ चिलाउने र सन स्ट्रक ‘लु’ लागेर मान्छे बेहोस हुने जस्ता समस्याहरु उत्पन्न भएको छ । केही दिनदेखि गर्मीसँगै तातो हावा चलेको कारण सर्वसाधारणहरु घरबाहिर निस्कन सकेका छैनन् । सरकारी कार्यालय, बैंक तथा वित्तीय संस्थाहरुमा सेवाग्राहीको उपस्थिति घट्दो छ । वृद्धवृद्धा, मजदुर तथा बालबालिकाहरू समेत बढ्दो गर्मीबाट प्रभावित बनेका छन् ।
खास गरि दैनिक ज्यालादारीमा काम गर्ने मजदुरहरू प्रभावित भएका छन् । रिक्सा, ठेला चालक, साइकलमा सामान बोकेर टोलटोल पुगी विक्री गर्ने तथा दैनिक ज्यालादारीले जिविकोपार्जन गर्नेहरु यसको चपेटामा नराम्ररी परेका छन् । चर्को गर्मीका कारण बजारमा दिउँसोको समय चहल पहलमा पनि कमि आएपछि मजदुरहरू काम पनि पाएका छैनन् भने सडक पेटीमा व्यापार गर्ने सानोतिनो व्यापारीहरु पनि आफ्नो व्यापार प्रभावित बनेको बताउँछन् । ग्रामीण क्षेत्रबाट किनमेल गर्न आउने ग्राहकहरू नआउँदा व्यापार पनि उत्तिकै प्रभावित बनेको छ । गर्मीको कारण बजार चहलपहल घट्नुको साथै सरकारी कार्यालयहरुमा पनि तुलनात्मक रूपमा सेवाग्राहीको संख्या पातलिएको छ ।
सर्वसाधारणहरु विहान र बेलुका मात्रै घर बाहिर निस्कन पाइरहेका छन् । घरबाहिर निस्कन नपाएपछि व्यापार देखि दैनिक काममा पनि कमि आएको स्थानीयहरुको भनाई छ । दैनिकी चलाउनका लागि काम गर्नुपर्ने बाध्यता छ तर चर्को घाममा काम गर्दा विभिन्न किसिमका रोग निम्त्याउने भएको कारण घामबाट बचेर दैनिकी कामकाज गर्नुपरेको मजदुरहरुको भनाई छ । यसैगरि रिक्सा, ठेला चालकहरुको आम्दनी पनि घटेको छ । विहान ५ बजे रिक्सा लिएर कमाउन निस्केका मजदुर ९ नबज्दै घर फर्किनुपर्ने अवस्था छ भने साँझ पुनः ३ बजेदेखि बजारमा काम खोज्न जानुपर्ने अवस्था रहेको रिक्सा चालकहरुको भनाई छ ।
रिक्सा चालकहरुका अनुसार दैनिक १५ सयदेखि २ हजारसम्म कमाई हुने गरेकोमा अहिले गर्मीले गर्दा दैनिक ५ देखि ७ सय रुपैयासम्म मात्रै कमाई हुने गरेको बताँछन् । विहान ५ बजेदेखि रातिको ९ बजेसम्म मजदुरी गर्न सक्ने ज्यालादारी मजदुरहरु अहिले अपरान्ह्को समयमा करिब ४ घण्टासम्म काम गर्न सकि रहेका छैनन् । काम गर्न चाहेर पनि सर्वसाधारणहरुको उपस्थिति पातलिएको कारण बजारमा यात्रुहरु नभेट्ने गरेको कारण अपरान्ह् ११ बजेदेखि २ बजेसम्म काम नै नपाउने गरेको बताउँछन् ।
यस्तो अवस्थामा परिवारलाई कसरी पाल्ने भन्ने चिन्ताले उनीहरुलाई सताएको छ । गर्मीले गर्दा घामको समयमा रिक्सा, ठेला चलाए विभिन्न प्रकारको समस्या हुने गरेकोले विहान र बेलुका मात्रै मजदुरी गर्ने गरेको उनीहरु बताउँछन् । अहिले वीरगंजको तापक्रम पनि बढेको छ । केही दिनदेखि वीरगंजको तापक्रम न्यूनतम २३ डिग्री सेल्सियस तथा अधिक्तम ४१ डिग्री सेल्सियससम्म पुग्ने गरेको छ । आइतबार वीरगन्जको तापक्रम न्यून्तम २६ डिग्री सेल्सियस र अधिक्तम ३८ डिग्री सेल्सियससम्म मापन गरिएको छ भने सोमबार न्यून्तम २७ डिग्री सेल्सियस र अधिक्तम ४० डिग्री सेल्सियस तापक्रम मापन गरिएको छ । यसैगरि आउँदो शनिबारसम्म वीरगंजको तापक्रम न्यून्तम २३ डिग्री सेल्सियस र अधिक्तम ४० डिग्री सेल्सियससम्म मापन गरिएको छ ।
यसरी तराईका जिल्लाहरुमा गर्मी बढेको कारण जनजीवन कष्टकरसँगै विरामीहरुको संख्यामा पनि उत्तिकै वृद्धि भएको छ । गर्मीयाम सुरु भएदेखि नारायणी अस्पतालमा विरामीको चापमा पनि वृद्धि भएको छ । अस्पतालहरुमा खास गरेर झाडापखाला, ज्वरो, सर्पदंशका विरामीहरुले खचाखच भरिएको छ । भाइरस संक्रमणबाट संक्रमित भाइरल ज्वरोका विरामी एवं ‘फड प्वाइजन’ युक्त खानाहरुबाट ग्रसित भई झाडापखालाका विरामीहरुको संख्या बढेको नारायणी अस्पताल आकस्मिक विभाग प्रमुख एवं सूचना अधिकारी फिजिसियन डा. उद्यनारायण सिंहले जानकारी दिए ।
उनका अनुसार मौसम परिवर्तन हुने बेलामा यो भाइरस सक्रिय भएकै कारण भाइरल ज्वरो, झाडापखाला, टाइफाइड जस्ता समस्याहरु देखा पर्ने गरेको बताए । तुलनात्मक हिसाबले झाडापखाला, भाइरल ज्वरो, टाइफाइड ज्वरो तथा सर्पदंशका विरामीहरुको संख्या बढि नै रहेको छ । ज्यानै जाने खालका विरामीहरु त छैनन् तर प्रायः ओपिडिहरुमा सामान्य ज्वरो एवं आकस्मिकमा उच्च ज्वरो, सर्पदंशका विरामीहरु आउने गरेका छन् ।
यसबाट बच्न अनावश्यक रुपमा घाममा नहिँड्ने, हिड्नै परे मौसम अनुसारको लुगा लगाएर घामबाट बचेर हिँड्नुपर्ने, पोषिलो खाना खानुपर्ने, बासी भात एवं बाहिरको खाना नखाने, हातमुख राम्ररी धुने, सरसफाईमा ध्यान दिने, प्रसस्त मात्रामा पानी पिउने, सर्प पाउने ठाउँमा खाली खुट्टा नजाने, अन्ध्यारोमा बाहिर ननिस्कने जस्ता सतर्कता अपनाउनुपर्ने उनको भनाई छ ।
प्रतिक्रिया दिनुहोस् !