पर्सामा १२ सिटको लागि १ सय ४४ जनाको उम्मेदवारी, स्वतन्त्र उम्मेदवार बढि

• हरिशंकर शर्मा
वीरगंज (पर्सा), २३ असोज / यही मंसिर ४ गते हुने प्रतिनिधिसभा तथा प्रदेशसभा निर्वाचनको लागि पर्सा जिल्लामा १ सय ४४ जनाले उम्मेदवारी दिएका छन् । पर्सा जिल्लामा ४ वटा प्रतिनिधिसभा तथा ८ वटा प्रदेशसभा गरि १२ वटा सिटको लागि १ सय ४४ जनाले उम्मेदवारी दिएका हुन् । पर्साको क्षेत्र नं. १ र २ को उम्मेदवारी दर्ता वीरगंज स्थित जिल्ला समन्वय समितिको सभाकक्षमा सम्पन्न भएको छ भने क्षेत्र नं. ३ को पोखरिया र क्षेत्र नं. ४ को धोबिनी गाउँपालिका स्थित लंगडीमा सम्पन्न भएको छ । उम्मेदवारी दिनेहरुमा बढि स्वतन्त्र उम्मेदवार छन् । १ सय ४४ जना उम्मेदवारमध्ये ८२ जना स्वतन्त्र उम्मेदवारी दिएका छन् भने ६२ जनाले राजनीतिक दलबाट उम्मेदवारी दिएका हुन् ।
आइतबार सम्पन्न उम्मेदवारी दर्ताको क्रममा प्रतिनिधि सभा सदस्यको लागि चार वटै निर्वाचन क्षेत्रमा ५० जनाले उम्मेदवारी दिएका छन् जसमध्ये २४ जना स्वतन्त्र उम्मेदवार छन् भने ८ वटा प्रदेशसभा सदस्यका लागि ९४ जनाले उम्मेदवारी दिएका छन् जसमध्ये ५८ जनाले स्वतन्त्र उम्मेदवारी दिएका हुन् । पर्साको निर्वाचन क्षेत्र नम्बर १ को प्रतिनिधिसभा सदस्यका लागि २२ जनाले उम्मेदवारी दिएका छन्, जसमध्ये १२ जनाले स्वतन्त्र उम्मेदवारी दिएका छन् भने १० जनाले दलगत उम्मेदवारी दिएको निर्वाचन अधिकृत विनोद कुमार पोखरेलले जानकारी दिए ।
त्यस्तै प्रदेशसभा सदस्यको लागि पर्सा निर्वाचन क्षेत्र नं. १ को (क ) मा १७ जनाले उम्मेदवारी दिएका छन्, जसमध्ये ११ जनाले स्वतन्त्र उम्मेदवारी दिएका छन् । त्यसैगरि पर्सा क्षेत्र नं. १ को (ख) मा १६ जनाले उम्मेदवारी दिएका छन् जसमध्ये १२ जनाले स्वतन्त्र तथा ४ जनाले दलगत उम्मेदवारी दिएको निर्वाचन अधिकृत पोखरेलले बताए ।
यसरी नै पर्साको निर्वचन क्षेत्र नम्बर २ को प्रतिनिधिसभा सदस्य तर्फ ११ जनाले उम्मेदवारी दिएका छन्, जसमध्ये ३ जनाले स्वतन्त्र उम्मेदवारी दिएका छन् भने ८ जनाले दलगत उम्मेदवारी दिएका छन् । प्रदेशसभा सदस्यको लागि पर्सा क्षेत्र नम्बर २ को (क ) मा ९ जनाको उम्मेदवारी परेको छ, जसमध्ये ५ जना स्वतन्त्र उम्मेदवार रहेका छन् भने ४ जनाले दलगत उम्मेदवारी दिएका छन् । यसरी नै पर्सा निर्वाचन क्षेत्र नं. २ को (ख) तर्फ १४ जनाले उम्मेदवारी दिएका छन्, जसमध्ये ९ जना स्वतन्त्र उम्मेदवार तथा ५ जना दलगत उम्मेदवार रहेको निर्वाचन अधिकृत सुशिल देवकोटाले जानकारी दिए ।
त्यसैगरि पर्साको निर्वाचन क्षेत्र नम्बर ३ को प्रतिनिधिसभा सदस्यका लागि ११ जनाको उम्मेदवारी दर्ता भएको छ, जसमध्ये ५ जनाले स्वतन्त्र उम्मेदवारी दिएका छन् भने ६ जनाले दलगत उम्मेदवारी दिएका छन् । प्रदेशसभा सदस्यको लागि पर्सा निर्वाचन क्षेत्र नं. ३ को (क) बाट १३ जनाले उम्मेदवारी दिएका छन्, जसमध्ये ८ जना स्वतन्त्र उम्मेदवार छन् भने ५ जनाको दलगत उम्मेदवारी परेको छ । यसरी नै पर्सा क्षेत्र नं. ३ को (ख) मा १४ जनाले उम्मेदवारी दिएका छन्, जसमध्ये ८ जनाले स्वतन्त्र उम्मेदवारी दिएका छन् भने ६ जनाले दलगत उम्मेदवारी दिएको निर्वाचन अधिकृत योगनाथ ढकालले जनाए ।
यसरी नै पर्साको निर्वाचन क्षेत्र नम्बर ४ को प्रतिनिधिसभा सदस्यका लागि ६ जनाले उम्मेदवारी दर्ता गराएका छन्, जसमध्ये ४ जनाले स्वतन्त्र उम्मेदवारी दिएका छन् भने २ जनाले दलगत उम्मेदवारी दिएका छन् । प्रदेशसभा सदस्यको लागि पर्सा निर्वाचन क्षेत्र नं. ४ को (क) मा ४ जनाले उम्मेदवारी दिएका छन्, जसमध्ये १ जनाले स्वतन्त्र उम्मेदवारी दिएका छन् भने ३ जनाले दलगत उम्मेदवारी दिएका हुन् । प्रदेशसभा सदस्यकै लागि पर्सा निर्वाचन क्षेत्र नं. ४ को (ख) बाट ७ जनाको उम्मेदवारी दर्ता भएको छ, जसमध्ये ४ जनाले स्वतन्त्र उम्मेदवारी दर्ता गराएका छन् भने ३ जनाले दलगत उम्मेदवारी दर्ता गराएको निर्वाचन अधिकृत रमेश श्रेष्ठले जनाए ।
प्रतिनिधिसभा तथा प्रदेशसभा सदस्यको लागि हुने निर्वाचनको लागि गठबन्धन गरेपछि स्वतन्त्र उम्मेदवारी दर्ता गराउनेहरुको सँख्यामा वृद्धि भएको छ । सधैं पार्टीको हितको लागि काम गर्दैै आएको तर निर्वाचनको बेला पार्टीका केन्द्रिय नेताहरुले आफ्नो स्वार्थको निम्ति आफूहरुको कार्यलाई मूल्याँकन नगरि टिकट नदिएपछि गठबन्धन बाहिर आएर पार्टीका नेताहरुले स्वतन्त्र उम्मेदवारी दिने होडबाजी नै चलेको छ । गठबन्धनको कारण धेरै नेताहरुले चुनाव लड्न नपाउने भएपछि पार्टीको निर्णय विपरित ‘बागी’ उम्मेदवार भएपनि चुनाव लड्न मैदानमा उत्रिएका हुन् ।