वीरगंज (पर्सा), २५ पुस । गैरसरकारी संस्था ‘युवा’ द्वारा वीरगञ्जमा तिन वर्षदेखि सञ्चालित यूथ एक्सेस परियोजनाको अनुगमन गरिएको छ । दातृ तथा सहयोगी संस्था अमेरिकाको वाशिङटन राज्यस्थित सियाटल सहरमा प्रधान कार्यालय रहेको प्लान्ड प्यारेनहुड अफ ग्रेट नर्थवैस्ट हवाई, अलास्का, इन्डियाना क्यान्टकी (पिपिजिएनएचएआईके) नामक संस्थाका ग्लोबल कार्यक्रमहरूका निर्देशक डायन बुस्लि र संस्थाका क्षमता अभिवृद्धि विशेषज्ञ अनुपा ज्ञवालीले परियोजनाको अनुगमन गरेका हुन् । उनीहरूसँगै युवाका कोषाध्यक्ष रितेन्द्र बडूले पनि परियोजनाको अनुगमनमा आएका थिए ।
शनिवार वीरगञ्ज आइपुगेको अनुगमन टोलीले वीरगञ्जका तिन वर्षका यूथ च्याम्पियनहरूसँग छलफल गरेको थियो । यूथ च्याम्पियनले गरेका कामसँगै उनीहरूले सिकेका कुराको कार्यान्वयनका विषयमा छलफल भएको यूथ एक्सेस परियोजनाका वीरगञ्जका संयोजक आशु कुमार सर्राफले बताए । उनकाअनुसार यूथ च्याम्पियनले युवासँग आबद्ध भएर सिकेका कुरा तथा भोगाइसँगै काम गर्दा आइपर्ने चुनौतीका बारेमा पनि चर्चा भएको थियो ।
यस्तै आइतबार यूथ च्याम्पियनहरूले गर्ने कामको अनुगमन गर्न उक्त टोली वीरगञ्ज महानगरपालिका – २६ बहुअरीस्थित श्री शारदा माध्यमिक विद्यालयमा पुगेको थियो । सुरक्षित गर्भपतन सेवा प्रवाह गर्ने वीरगञ्जस्थित मेरि सर्भिस सेन्टरको पनि टोलीले भ्रमण गरेको थियो । भेटघाटका क्रममा सेन्टरका प्रमुख सन्दीप चौरसियाले सुरक्षित गर्भपतन सेवा प्रवाहका बारेमा जानकारी दिएका थिए ।
सोमवार वीरगञ्जस्थित ममता विद्या मन्दिरमा पुगेर यूथ च्याम्पियनले सुरक्षित गर्भपतन र लैङ्गिक तटस्थ भाषा, लैङ्गिक समानता, एलजिबिटीक्युआईए प्लसका सम्बन्धमा प्रस्तुति दिएका थिए । उक्त सत्रको पनि अनुगमन टोलीले अनुगमन गरेको थियो । 
वीरगञ्ज महानगरपालिकाका स्वास्थ्य शाखा प्रमुख अनिल यादव र प्रतिनिधि अनिशकान्त कुशवाहसँग पनि भेटघाट गरेको सर्राफले जानकारी दिए । भेटघाटका दौरान परियोजनालाई अझै प्रभावकारी बनाउने र एकआपसमा समन्वय तथा सहकार्य गर्ने बारेमा पनि छलफल भएको थियो । युवाले बृहत्तर यौनिकता शिक्षा बारेमा १ देखि १२ कक्षा सम्मको लागि तयार पारेको पाठ्यक्रम वीरगञ्ज महानगरले पनि आफ्नो पाठ्यक्रममा समावेश गर्ने बारेमा समेत छलफल भएको थियो ।
साथै नारायणी अस्पतालका मेडिकल सुपरिटेन्डेन्ट डा. चितरञ्जन साहसँग नारायणी अस्पतालबाट प्रवाह हुने सेवाका बारेमा छलफल भएको थियो । बृहत्तर यौनिकता शिक्षा र सुरक्षित गर्भपतनका बारेमा पाठ्यक्रममा समावेश गर्न डा. साहले आग्रह गरे । शिक्षकहरूलाई पनि बृहत्तर यौनिकता शिक्षाका बारेमा प्रशिक्षण दिएर अध्यापनमा सहज बनाउनुपर्ने डा. साहको सुझाव थियो ।
स्त्री तथा प्रसूति रोग विशेषज्ञ डा. सुरेन्द्र चौधरी, ओसीएमसी प्रमुख हेमा थापा र स्त्री तथा प्रसूति रोग विशेषज्ञ डा. कृति अग्रवालसँग पनि टोलीले भेटघाट गरेको थियो । सुरक्षित गर्भपतनसँगै स्वास्थ्य क्षेत्रमा काम गर्ने विभिन्न सरोकारवालासँगको भेटघाट तथा छलफलपश्चात् प्राप्त सुझावहरूलाई आगामी दिनमा आत्मसाथ गर्ने युवाका कोषाध्यक्ष रितेन्द्र बडूले बताए ।
अनुगमनका क्रममा परियोजना प्रभावकारी रूपमा सञ्चालन भएको भन्दै निर्देशक डायन बुस्लिले खुशी व्यक्त गरिन् । यस परियोजनाको पहुँचलाई ग्रामीण क्षेत्रमा पनि बिस्तार गर्न आग्रह गर्दै उनले युवामैत्री स्वास्थ्य सेवाको लागि सबैले हातेमालो गर्नुपर्ने आवश्यकता औँल्याइन् । 
प्रतिक्रिया दिनुहोस् !